«Նրա` մեկուսարանում գտնվելու փաստը միանգամայն ապօրինի է». Ազատամարտիկները պահանջում են ազատել գնդապետ Ավետիսյանին

Ազատամարտիկների խորհուրդը Հայաստանի նախագահ Սերժ Սարգսյանին, ԱԺ նախագահ Հովիկ Աբրահամյանին, ՀՀ վարչապետ Տիգրան Սարգսյանին, ՀՀ գլխավոր դատախազի պաշտոնակատար Արամ Թամրազյանին, ՀՀ պաշտպանության նախարար Սեյրան Օհանյանին ուղղված բաց նամակ է տարածել, որում նշվում է հետևյալը.

«Սույն թվականի սեպտեմբերի 19-ին, ժամը 22:30-ին իր տնից առևանգվել է ազատամարտիկ, Հայոց բանակաշինության մեջ մեծ դերակատարություն ունեցող գնդապետ Վոլոդյա Ավետիսյանը: 20.09.2013 թ. ՊՆ-ն հայտարարություն է տարածել, ըստ որի իբր թե Վոլոդյա Ավետիսյանը մեծ չափով գումար է հափշտակել կամ խաբեությամբ վերցրել` Հ. Զաքարյանի թոռանը բանակից ազատելու համար: Այդ անհեթեթ հայտարարությունը չի կարող համապատասխանել իրականությանը, քանի որ նախ` Վ. Ավետիսյանն այս պահին պահեստի գնդապետ է և համակարգում որևէ պաշտոն չի զբաղեցնում, ապա` նրան ճանաչելով` հայտնում ենք, որ նա այդ անձնավորությունը չէ:

Մենք համոզված ենք, որ նրա նկատմամբ այդ սադրանքը պայմանավորված է վերջին ամիսների հասարակական ակտիվ գործունեությամբ, որով նա պահանջում է արժանապատիվ կյանք` բոլոր ազատամարտիկների համար: Մի՞թե բազմաթիվ պարգևներ և մեդալներ ստացած, ազատամարտիկների մոտ հարգանք վայելող հրամանատարն արժանի էր այսպիսի շնորհավորանքի` անկախության 22-րդ տարելիցի կապակցությամբ:

Նրա` մեկուսարանում գտնվելու փաստը միանգամայն ապօրինի է: Մենք մեր զայրույթի ձայնն ենք բարձրացնում և պահանջում անհապաղ ազատ արձակել նրան մեկուսարանից: Եթե նախաքննությանն անհրաժեշտ է նրա ներկայությունը, ապա մենք` ներքո ստորագրյալներս, երաշխավորում ենք, որ նա չի խոչընդոտի այդ գործընթացին:

Ռազմի դաշտում լինելով Լեոնիդ Ազգալդյանի ընկերը և նրա տեղակալը` նա միշտ աչքի է ընկել մարդասիրական հատկանիշներով, քարոզել ու մինչև օրս քարոզում է օրինականություն և հայրենասիրություն: Նման անձնավորությունը չի կարող լինել հանցագործ և անկախության տոնը պետք է նշեր իր մարտական ընկերների հետ: Պահանջում ենք ազատ արձակել Վ. Ավետիսյանին, այլապես նրան դատապարտելը մեծ հարված կլինի ոչ միայն ազատամարտիկների, այլև ազգային բանակի հեղինակությանը»:

Նշենք, որ նախօրեին դատարանը բավարարել է նախաքննական մարմնի միջնորդությունը և Վոլոդյա Ավետիսյանի նկատմամբ, որպես խափանման միջոց, որոշվել է կիրառել երկամսյա կալանքը:

Ավելի վաղ Panorama.am-ը տեղեկացրել էր, որ ՊՆ քննչական ծառայության հաղորդագրության համաձայն, Ավետիսյանը կասկածվում է խոշոր չափի խարդախություն կատարելու համար: Նա ձերբակալված է: Ըստ ՊՆ քննչական ծառայության, Վ. Ավետիսյանը, խաբեության և վստահությունը չարաշահելու եղանակով քաղաքացի Հ.Զաքարյանի թոռանը պարտադիր ժամկետային զինվորական ծառայությունից ազատելու հարցում աջակցություն ցույց տալու պատրվակով, Հ.Զաքարյանից հափշտակել է 2000 ԱՄՆ դոլար գումար: Քրեական գործի նախաքննությունը շարունակվում է:

Աղբյուր` Panorama.am