Սեքսից դեպի լուրջ հարաբերություններ. արդյոք հնարավո՞ր է

Հերթական անգամ բուռն սեքսով զբաղվելուց հետո արթնանում ես նրա կողքին ու հասկանում, որ այդ գիշերը հետք է թողել ոչ միայն քո սանրվածքի ու վզի, այլ սրտիդ վրա: Ուրեմն ի՞նչ ես նստել. ժամանակն է գործելու:
Ըստ Մարգարիտա Եսոյանի

Աշխատանքային ծանր շաբաթվա ավարտին յուրաքանչյուրն իրավունքունի հանգստանալու ու լիցքաթափվելու: Ակումբ, ռիթմիկ ու կրքոտ պարեր, ընդունվածից մի փոքր ավելի խմիչք, ու բախտի բերմամբ, թե ճակատագրի հեգնանքով նույն պարահրապարակում քո կողքին հայտնվում է մի շատ գրավիչ երիտասարդ` իսկը հոլիվուդյան աստղ: Պարում եք, նրա ձեռքերն անընդհատ սահում են քո մարմնով, վզիդ ու ականջիդ շրջանում պարբերաբար զգում ես նրա տաք շնչառությունը, հետո կրքոտ համբույրներ, ու դուք արդեն ավտոմեքենայի մեջ եք, շտապում եք հասնել նրա բնակարան` խնջույքի տրամաբանական շարունակությունը վայելելու

Կարծես թե ոչ մի խնդիր չկա. պարզապես մեկ գիշերվա զուգընկերներ, ովքեր պարբերաբար հանդիպում են նույն վայրում ու արդեն պարբերաբար առավոտյան արթնանում նույն անկողնում: Իսկ ի՞նչ, եթե նման մի առավոտ դու արթնանում ես ու հասկանում՝ ամեն ինչ կտայիր, որ այդ ամենը վերաճեր ավելի մեծ ու լուրջ հարաբերությունների, իսկ դու նրա համար լինեիր ավելին, քան մեկ գիշերվա զուգընկերուհի:

Հոգեբանի կարծիք

Առանց հարաբերությունները խորացնելու սեքսով զբաղվելով՝ դու, կամա թե ակամա, միանգամից հայտնվում ես այն կնոջ կարգավիճակում, որի հետ միայն ժամանակ են անցկացնում: Սակայն պետք չէ մոռանալ մի շատ կարևոր հանգամանք, որը բնորոշ է բոլոր տղամարդկանց` տղամարդու համար կնոջ հատկանիշներից կարևորագույնը վերջինիս սեքսուալությունն է: Եթե սեքսում ձեզ մոտ ամեն ինչ լավ է, դու արդեն կարևոր ես այդ մարդու համար: Այս դեպքում դու առավելություն ունես: Մնում է գործել ու փորձել ներկայանալ նաև այլ` քեզ համար շահեկան կողմերով: Եղիր համբերատար, մի՛ կորցրու սառնասրտությունդ ու ճիշտ պլանավորիր գործողություններդ, եղիր ազնիվ ու անկեղծ, ցույց տուր նրա հանդեպ տածած սերդ ու հոգատարությունդ:
Այն, որ դու անկողնում խենթացնող ես, նա առաջին անգամ չէ, որ պարզում է իր համար, բայց այն, որ դու կարող ես ունենալ բազմաթիվ այլ դրական կողմեր, այ դա դժվար թե իմանա: Այնպես որ, հետևելով հոգեբանի խորհրդին, հարաբերություններն այլ մակարդակ տեղափոխելու համար պետք է ներկայանալ այլ լույսի ներքո:
Հա, ու մի բան էլ, պետք է գործել որքան հնարավոր է արագ. դե, սովորաբար երկաթը տաք-տաք են ծեծում:

Արտահայտիր զգացողություններդ

Հերթական անմոռանալի սեքսից հետո արթնացրու նրան քո ձեռքերի նուրբ հպումներով: Երբ զգաս, որ նա բավականաչափ արթուն է խոսքերդ ընկալելու համար, ասա, որ տպավորված ես նրանով, նրա մարդկային արժեքներով: Առանձին մի՛ անդրադարձիր, թե ինչպիսին էր նա անկողնում: Պարզապես ասա, որ այն, ինչ կատարվեց նախորդ գիշեր, քո կյանքի ամենավառ ու երջանիկ պահերից մեկն էր: Մի՛ ամաչիր կիսվել նրա հետ քո դրական զգացողություններով:

Հրավիրիր նախաճաշի

Կրքոտ գիշերից հետո առաջարկիր միասին նախաճաշել։ Ի դեպ, նախաճաշը հենց դու ես պատրաստելու, այնպես որ, եթե ձվածեղ պատրաստել չգիտես, ապա ժամանակ մի՛ կորցրու. չգիտես, թե երբ և ինչ պետք կգա: Նախաճաշելիս խոսիր այն թեմայի շուրջ, որը սկսել էիք նախորդ գիշեր, մինչև սեքսով զբաղվելը: Նա պետք է հասկանա, որ դու կարևորում ես նաև նրա հետ շփումը, նրա անձը և ոչ միայն նրա կրքոտ մարմինը:

Ժամադրություն նախաձեռնիր

Ընտրիր որևէ միջոցառում, որն առավել քան նրա սրտով կլինի: Օրինակ՝ եթե նա արվեստի սիրահար է, հրավիրիր որևէ թանգարան, իսկ եթե սպորտի մոլի երկրպագու է, հրավիրիր հետաքրքիր մարզական հանդիպում դիտելու: Միջոցառումն ընտրելիս առաջնորդվիր այն սկզբունքով, որ մթնոլորտը տրամադրող լինի զրուցելու, շփվելու և ոչ թե՝ սեքսով զբաղվելու: Մի՛ մոռացիր, որ դու քայլեր ես անում ձեր հարաբերությունները լրջացնելու ուղղությամբ: Եվ հիշիր` քո տուն գնալու հրավերը կարող է դիտվել որպես սեքսով զբաղվելու և ոչ թե միասին հաճելի ժամանակ անցկացնելու առաջարկություն:

Սեղմիր Pause կոճակը

Երկու կամ երեք շաբաթ շարունակ նմանատիպ հանդիպումներ կազմակերպելուց հետո մի փոքր պասիվ դիրք գրավիր: Եթե նա զանգի ու ևս մեկ անգամ առաջարկի հանդիպել գիշերային ակումբում, որտեղից ենթադրվում է, որ դուք էլի միասին կգնաք նրա բնակարան, ապա հրաժարվիր՝ ասելով, որ փոխարենն այդ երեկո մեծ հաճույքով կգնայիր ջազ երաժշտություն վայելելու կամ երեկոյան քաղաքով պարզապես զբոսնելու:

Եվ պետք չէ հուսահատվել, երբ հարաբերությունները սկսվում են հենց սեքսից. չէ՞ որ այս դեպքում զուգընկերները չեն շփոթի սիրահարվածությունը սեքսուալ ձգողության հետ, և իսկական զգացմունքների վրա հիմնված լուրջ հարաբերությունների հավանականությունն ավելի մեծ կլինի: Այնպես որ, օգտվիր ընձեռված հնարավորությունից:

•