Ավտովթար Գեղարքունիքի մարզում. երիտասարդ ամուսինները մահացել են, կան վիրավորներ

 Այսօր` օգոստոսի 17-ին ավտովթար է տեղի ունեցել Գեղարքունիքի մարզում: Ժամը 07.00-ի սահմաններում «Օպել» մակնիշի 10 ՏՕ 129 համարանիշի ավտոմեքենայի վարորդ Գեղարքունիքի մարզի Ծովագյուղի բնակիչ 31-ամյա Սևակ Բադասարյանը, Երևան-Իջևան ավտոճանապարհի 53-րդ կմ-ին դուրս է եկել ճանապարհի երթևեկելի գոտուց և բախվել երթևեկելի գոտուց դուրս կայանված` ԼՂՀ բնակիչ 47-ամյա Բարիս Մեջլումյանի վարած «Կամազ 55-11» մակնիշի 141 ՍԼ 41 համարանիշի ավտոմեքենային: 

Ֆոտոլրագրող Գագիկ Շամշյանը shamshyan.com-ին դեպքի վայրից հայտնել է, որ վթարի հետևանքով վարորդը և ուղևոր` Ծովագյուղի բնակիչ 29-ամյա Մարինե Բադալյանը, մահացել են: Մարմնական վնասվածքներով Հրազդանի հիվանդանոց է տեղափախվել Ծովագյուղի բնակիչ 21-ամյա Դավիթ Ավետիսյանը , իսկ Սևանի հիվանդանոց` 9-ամյա Մհեր Բաղդասարյանը և 1 տարեկան 8 ամսեկան Արծրուն Բաղդասարյանը: 

Դեպքի վայրում հավաքվածները ֆոտոլրագրողին պատմել են, որ մահացածներին և վիրավորներին ավտոմեքենայից դուրս են բերել «Կամազ 55-11» մակնիշի վարորդն ու նրա հետ եղած անձինք: Վիրավորներին դուրս բերելուց հետո` նրանք զանգահարել են Շտապօգնություն և Ոստիկանություն: Ֆոտոլրագրողի հետ զրույցում պատմել են , որ Շտապօգնությունը վթարի վայր էր հասել բավականին ուշացումով, և մինչ նրանց ժամանումը, ամուսիններն արդեն մահացան: Կարճ ժամանակում միայն ժամանել են Ոստիկանության Սևանի բաժնի օպերատիվ խումբը` Սևանի Ոստիականապետ Վիգեն Աղեկյանի գլխավորությամբ: Դեպքի վայր են ժամանել նաև Ճանապարհային Ոստիկանության 2-րդ սպայական գումարտակի հրամանատարի տեղակալ Դավիթ Ավագյանն ու ՃՈ 2-րդ սպայական գումարտակի չորրորդ վաշտի աշխատակիցները` հրամանատար Սերգեյ Հակոբյանի գլխավորությամբ:

Դեպքի վայրում քննչական աշխատանքները ղեկավարել է Ոստիկանության քննչական գլխավոր վարչության Գեղարքունիքի մարզի քննչական բաժնի Սևանի քննչական բաժանմունքի քննիչ Արամ Մարտիրոսյանը: Քննիչի հանձնարարականով` ավտոմեքենաները տեղափոխվել են Ոստիկանության Սևանի բաժնի հատուկ պահպանման տարածք:

Գ. Շամշյանը հայտնել է, որ դեպքի վայրում հավաքվածները պատմում էին, եթե Շտապօգնությունը ժամանակին ժամաներ դեպքի վայր, հնարավոր էր քաղաքացիների կյանքը փրկել, ովքեր ըստ հավաքվածների` ամուսիններ էին: 









Լուսանկարները` Գագիկ Շամշյանի

                                                                                                                             http://1in.am