Իմ կյանքի ամենավատ արարքը

Այս աղջիկը «գողացել» է իր ընկերուհու ընկերոջը, սակայն դա արդարացի էր... Համալսարանում մոտ ընկեր ունեի` Արամը (անունները փոխված են): Նա վերջին կուրսում սկսեց հանդիպել իմ ուսանողական ընկերուհու` Էմմայի հետ...

Մենք նույն առարկան էինք սովորում և տարիների ընթացքում հասցրել էինք մտերմանալ. միասին գնում էինք գրադարան, տարբեր միջոցառումների: Նա հետաքրքիր էր, խելացի, շատ համակրելի ու ըմբռնող, այնքան ըմբռնող, որ Էմման սկսեց չարաշահել դա: Նա դավաճանում էր Արամին, և շրջապատում հպարտանում իր ձեռքբերումներով: Արամի ընկերներն անընդհատ փորձում էին վերջինիս զգուշացնել, որ Էմման իրեն հիմարացնում է, սակայն Էմման ժխտում էր, դե իսկ Արամն էլ հավատում էր միայն Էմմային:

Ավարտական տարում ես ու Արամը սկսեցինք միասին ավելի շատ ժամանակ անցկացնել: Ես նրան երբեք այլ կերպ չէի ընկալել, քան ընկեր, սակայն հանկարծ սկսեցի նկատել, թե ինչ գեղեցիկ է նա կիսախավարում՝ իր գրքերի վրա հակված: Ամեն անգամ, երբ նրա ձեռքը պատահաբար դիպչում էր ինձ, ցանկանում էի, որ դա նորից կրկնվի: Եվ հասկացա, որ Էմմային պետք է հեռացնեմ իմ ճանապարհից:

Միշտ երազում էի, որ Արամը վերածվեր մի փոքրիկ բզեզի և կարողանար ներկա գտնվել իմ ու Էմմայի զրույցներից մեկին:
Այդ ժամանակ ես աշխատում էի ուսանողական թերթում և փոքրիկ ձայնագրիչ ունեի, որով հարցազրույցներ էի անում: Երկար մտածելուց հետո մի օր այն խցկեցի պայուսակիս մեջ. հենց դրա միջոցով էի որոշել հասնել նպատակիս...

Ես երկար չսպասեցի. երբ հանդիպեցինք, Էմման անմիջապես սկսեց պատմել, թե նախորդ օրն ինչպես է սիրային հանդիպման գնացել և ապա` սեքսով զբաղվել այդ երիտասարդի հետ Արամի հետ ընթրելուց անմիջապես առաջ: Ես հանգիստ ձեռքս տարա գրպանս և միացրեցի ձայնագրիչս: Հաջորդ օրը ձայնագրության օրինակն արդեն Արամի բնակարանում էր:

Արամի հետ մի քանի օր չէի տեսնվել, սակայն երբ հերթական անգամ տեսա Էմմային, պարզ դարձավ, որ Արամը լսել է ձայնագրությունը: Էմման լացակումած պատմում էր, որ Արամը շատ անսպասելի բաժանման որոշում է կայացրել:

Երբ ի վերջո տեսա Արամին, նա միանգամից հարցրեց` ես եմ արդյոք ուղարկել այդ ձայնագրությունը: Ես նրան խաբել չէի կարող, և գլխով դրական պատասխան տվեցի: Փոխանակ զայրանալու` նա ինձ հանդիպման հրավիրեց: Մենք սկսեցինք ավելի հաճախ հանդիպել, ապա այդ հանդիպումները սկսեցին կանոնավոր բնույթ կրել: Էմման անասելի զայրացած էր: Նա զգում էր, որ Արամի հեռանալու գործում ես ինչ-որ մասնակցություն եմ ունեցել, սակայն ապացույց չուներ: Այո՛, կյանքը լի է անկանխատեսելի շրջադարձերով:

http://www.cosmo.am/