Հին եգիպտացիները երկնաքարերից պատրաստել են զարդեր

  Բրիտանացի գիտնականների վերջին հետազոտությունը ապացուցում է, որ հին եգիպտացիները մետաղի հետ առնչվել են երկաթի ձուլման առաջին վկայություններից հազարավոր տարիներ առաջ: Ավելին՝ պարզվել է, որ նրանք հետևել են ընկնող երկնաքարերին, ու երկնքի ուսումնասիրությունը կարևոր տեղ է զբաղեցրել նրանց մշակույթում ու առօրյա կյանքում: 

«Երկինքը շատ կարևոր է եղել հին եգիպտացիների համար: Եթե ինչ-որ բան է ընկել երկնքից, ապա նրանք դա ընկալել են որպես աստվածների պարգև»,- բացատրում է հետազոտության համահեղինակ Ջոյս Թիլդեսլին Մանչեսթրի համալսարանից: Այս մասին հայտնում է vesti.ru-ն: 

1911թ. հնագետները հայտնաբերել էին Գերզեյան մշակույթի շրջանին պատկանող 9 խողովակատիպ մետաղյա ուլունքներ, որոնք թվագրվում են Ք.ծ.ա. 3300 թվականին և համարվում են Հին Եգիպտոսի ներկայացուցիչների կողմից պատրաստված մետաղյա հնագույն զարդեր: 

1928թ. անցկացված հետազոտությունը պարզել է, որ այդ ուլունքներն իրենց մեջ պարունակում են նիկել, ինչը հատուկ է երկնաքարերին: 

1980-ականներին գիտնականները հայտարարել են, որ գտածոն վկայում է երկնաքարերի ձուլման փորձի մասին:

Պարզելու համար դրանց իրական ծագումը՝ Դայան Ջոնսոնը՝ Միլթոն-Կինսի Բաց համալսարանից, անալիզի է ենթարկել վզնոցի օղերից մեկը, որը պահվում է Մանչեսթրի թանգարանում: Դրա համար նա օգտագործել է էլեկտրոնային մանրադիտակ և համակագչային տոմոգրաֆիա: Պարզվել է, որ նիկելի պարունակությունը բավական բարձր է՝ մոտ 30 տոկոս, ինչն ապացուցում է, որ նյութը ունի երկնաքարային ծագում՝ մամլո ասուլիսում հայտնել են գիտնականները: 

Հետազոտության արդյունքները հրապարակվել են Meteoritics & Planetary Science ամսագրում: 

http://www.1in.am