Վանաձորի սառցակալած ու ձյան շերտից չմաքրված փողոցներով երթեւեկող մի շարք երթուղայինների վարորդներ շարունակում են կամ գիծ դուրս չգալ, կամ էլ գործադուլ անել՝ այդ կերպ չսպասարկելով բնակչությանը: Ինչպես հայտնում էNEWS.am-ի Լոռիի թղթակիցը, երկու օր առաջ տեղացած առատ ձյունը շարունակում է խնդիրներ ստեղծել մարզկենտրոն Վանաձորում, նույնիսկ կենտրոնական փողոցները բավարար չափով մաքրված չեն ձյան շերտից, իսկ ծայրամասայինների մասին խոսք լինել չի կարող: Նույն անմխիթար վիճակում են նաեւ մայթերը:
Այս ամենի պատճառով մի շարք երթուղայինների վարորդներ երեկ գործադուլ են հայտարարել, դժգոհելով փողոցների սառցակալած լինելու հետ կապված, որոշ թաղամասեր սպասարկող երթուղայինների վարորդներն էլ պարզապես չեն աշխատում: Խնդրի հետ կապված լուրջ քննարկումներ են ծավալվում նաեւ սոց կայքերում: Խնդրին տեղյակ է նաեւ թիվ 30 ընտրատարածքից ընտրված, անկախ պատգամավոր Էդմոն Մարուքյանը, ում փոխանցմամբ` ինքն ամեն օր մի քանի տասնյակից ավել բողոքներ է ստանում քաղաքացիներից. «Մի բան հստակ է թե ամանօրյա Վանաձորյան պատրաստությունը եւ թե դրան հետեւած բնական եղանակային պայմաններին դիմակայելու անկարողությունը մի եզրահանգման է բերում` Վանաձորը կանգնած է փոփոխությունների անհրաժեշտության առջեւ կամ պատասխանատուները կսկեն աշխատել կամ ժողովուրդը կգտնի այլ պատասխանատուներ»: Լուրջ դժվարություններ են ստեղծվել նաեւ շտապ բուժօգնության ծառայության համար: Վանաձորցիները NEWS.am-ի Լոռիի թղթակցի հետ զրույցում դժգոհել են, որ քաղաքապետարանը շարունակում է հնամաշ տեխնիկայով աչքակապությամբ զբաղվել: «Մի քանի հնամաշ, շարքից դուրս եկած տեխնիկա են փողոց հանել, թե տեսեք-տեսեք գործ ենք անում…կես ժամ աշխատում են, մի ժամ՝ կանգնում, ու սա էլ մարզկենտրոն է համարվում»,-նշել է վարորդներից մեկն ու հավելել, որ վիճակը կշարունակվի դեռ այնքան ժամանակ, մինչեւ որ պատասխանատու պաշտոններ կզբաղեցնեն ոչ թե ծանոթ-բարեկամները, այլ իրապես գիտակ մարդիկ:
Комментариев нет:
Отправить комментарий