Դրսում աշխատող ՀՀ քաղաքացիները կքվեարկեն էլեկտրոնային եղանակով

ՀՀ կենտրոնական ընտրական հանձնաժողովն այսօր որոշեց ՀՀ ԱԺ ընտրության մասնակցելու ցանկություն ունեցող ՀՀ դիվանագիտական եւ հյուպատոսական ներկայացուցչությունների աշխատողների, նրանց ընտանիքների անդամների եւ դրսում աշխատող ՀՀ քաղաքացիների համար կազմակերպել էլեկտրոնային քվեարկություն:
Սա նման առաջին փորձն է Հայաստանում, չի բացառվում, որ հետո նման քվեարկություն կազմակերպվի նաեւ հայաստանցիների համար:

ԿԸՀ նախագահ Տիգրան Մուկուչյանը ասաց, հարցը երկար է քննարկվել, հաշվի են առնվել եվրոպական կառույցների առաջարկություններն ու նկատառումները, տպվելու է էլեկտրոնային քվեարկության մասին ուղեցույց:
Համաձայն կարգի, Հայաստանի դիվանագիտական եւ հյուպատոսական ներկայացուցչությունների աշխատողների եւ նրանք ընտանիքի քվեարկելու իրավունք ունեցող անդամների ցուցակը ՀՀ արտաքին գործերի նախարարություն կներկայացվի քվեարկության օրվանից 50 օր առաջ, ԱԳՆ-ն կստուգի դրանք եւ ԿԸՀ կներկայացնի 41 օր առաջ, ԿԸՀ-ն երկօրյա ժամկետում կհրապարակի դրանք եւ ԱԳՆ-ին փակ ծրարներով կտրամադրի քվեարկողի անհատական ծածկագրեր, որոնք կուղարկվեն դրսի քվեարկողներին:
ԿԸՀ նախագահը հավատացրեց, որ արվել է առավելագույնը ընտրության գաղտնիությունը, թափանցիկությունն ու անվտանգությունը ապահովելու համար:
Հայաստանի դիվանագիտական եւ հյուպատոսական ներկայացուցչությունների աշխատողների եւ նրանք ընտանիքի քվեարկելու իրավունք ունեցող անդամները քվեարկելու են Հայաստանում քվեարկության օրվանից 9-5 օր առաջ, սակայն նրանց քվեարկության արդյունքները ամփոփվելու են ընդհանուր քվեարկության արդյունքների հետ:
Բացի սրանից, ԿԸՀ-ն որոշեց, որ կուսակցություններն ու կուսակցությունների դաշինքները շարժական եւ անշարժ գույքի հայտարարագրերում պարտադիր կներկայացնեն նաեւ 8 միլիոն դրամ արժողությամբ թանկարժեք իրերը:

HayNews.am