Ադրբեջանական զինված ուժերը շարունակում են խախտել հրադադարի ռեժիմը, այդ թվում կրակում են գյուղերի եւ գյուղատնտեսական ցանքատարածքների ուղղությամբ:
Այսպես, օգոստոսի 22-ի ցերեկը ադրբեջանական կողմից Մովսես գյուղի այգիների ուղղությամբ ինքնաձիգային կրակահերթ է արձակվել: Բարեբախտաբար, ոչ ոք չի տուժել:
Ադրբեջանական զինված ուժերը նման գործողություններով փորձում են խանգարել Հայաստանի սահմանամերձ գյուղերի բնակիչների գյուղատնտեսական աշխատանքներին:
Գիշերը ադրբեջանական կողմից մի քանի կրակոցներ են արձակվել Մովսես գյուղի հայկական դիրքերի ուղղությամբ:
Հիշեցնենք, 2012թ. հունիսի 1-ին համանման հանգամանքներում վիրավորվել էր Ներքին Կարմրաղբյուր գյուղի բնակիչ, 1960թ. ծնված Վաչե Մելքումյանը: Առավոտյան ժամը հինգի սահմաններում նա ուղեւորվել էր խաղողի այգի: Արեւածագից քիչ անց կրակոց էր որոտացել. դիպուկահարը կրակել էր գյուղացու ոտքին: Տղամարդուն հաջողվել էր սողալով կրակի գծից մի քանի մետր հեռանալ: Այնտեղ նա կարողացել էր զանգահարել աներձագին եւ օգնության կանչել, հետո շարունակել էր սողալը: Ադրբեջանցի դիպուկահարը եւս մի քանի կրակոց էր արձակել վիրավորներին օգնության շտապողների ուղղությամբ:
Комментариев нет:
Отправить комментарий