Լոռիի մարզի Հարթագյուղ համայնքում սիբիրյան խոցով վարակված անձինք արդեն դուրս են գրվել հիվանդանոցից: Այս մասին NEWS.am-ի թղթակցի հետ զրույցում ասաց Հարթագյուղի գյուղապետ Անդրանիկ Հարությունյանը:
Նա նշեց, որ սիբիրյան խոցով վարակվել էին 11 մարդ, բոլորն արդեն լավ են: Վարակի աղբյուրը կենդանին էր, սիբիրյան խոցի թեթեւ մաշկային դրսեւորումն էր: Գյուղապետը վստահեցրեց, որ վարակի օջախը մեկսւսացված է, մի շարք միջոցառումներ են ձեռնարկվել, այժմ գյուղացիներին վտանգ չի սպառնում:
Հիշեցնենք, որ Լոռու մարզի Հարթագյուղ համայնքում հոկտեմբերի 4-ին երեք անձի մոտ արձանագրվել է սիբիրյան խոց (մաշկային ձեւ): Առողջապահության նախարարության եւ մարզի առողջապահական կառույցների մասնագետների կողմից կազմակերպված բակային համայցի արդյունքում հայտնաբերվել են եւս ութը: Հիվանդները ենթարկվել են լաբորատոր հետազոտության: Յոթ հիվանդի մոտ հաստատվել է սիբիրյան խոցի մաշկային ձեւը: Մյուսների հետազոտություններն ընթացքում են: Հիվանդները հոսպիտալացվել են եւ ստանում են անհրաժեշտ բուժում: Նրանց վիճակը գնահատվում է միջին ծանրության եւ ունեն առողջացման դրական տեղաշարժ:
Կազմակերպված եւ իրականացված համաճարակաբանական հետազոտությունների արդյունքում պարզվել է, որ հիվանդության հավանական վարակի աղբյուրը համայնքում արձանագրված կենդանիների անկումներն են, որոնց մսեղիքն օգտագործվել է սննդում: Միաժամանակ պարզվել է, որ մսեղիքի որոշ չափաբաժին տեղափոխվել է Գյումրի: Իրականացված հետազոտությունների արդյունքում Գյումրիում հայտնաբերվել է չորս կասկածելի հիվանդ, որոնք հոսպիտալացվել են, կազմակերպվել են լաբորատոր հետազոտություններ (ընթացքում են) եւ բուժում: Հիվանդության տեղայնացման եւ հիվանդների վաղաժամ հայտնաբերման նպատակով շարունակվում են բակային համայցերը: Որպես վարակի հավանական աղբյուր առգրավվել է մսեղիքը, իրականացվում է տնային տնտեսությունների կենցաղային պարագաների ախտահանում:
Комментариев нет:
Отправить комментарий